Bydd Bondiau Bonws Plant yn newid, gan ddechrau ar 20 Medi 2012.

Beth sy’n newydd?

Dyma grynodeb o'r hyn sy'n newid.

Newidiadau ariannol

• cosb am dynnu arian allan yn gynnar. Mae'r gosb yn gyfwerth â 90 diwrnod o logau ar yr arian a dynnwyd allan.
• un gyfradd flynyddol o logau ar gyfer pob cyflwyniad (dim bonws). Ar ben yr enillion cyfansawdd, byddwn yn gwarantu talu cyfradd uwch o logau am bum mlynedd, ond heb fonws ar y diwedd (o’r blaen, roedden ni’n talu cyfradd flynyddol is ond yn talu bonws ar ddiwedd pob tymor o bum mlynedd).

Enw newydd

• bydd y rhain yn cael eu galw’n Bondiau Plant yn hytrach na Bondiau Bonws Plant. Mae hyn i ddangos y newid i sut y byddwn yn talu llogau (gweler uchod).

Gofalu am fuddsoddiad eich plentyn

• datganiadau blynyddol i’ch helpu i gadw golwg. Yn fuan ar ôl pob dyddiad pen-blwydd, byddwn yn anfon datganiad at y person sy’n gofalu am y Bond yn dangos ei werth a faint o logau sydd wedi’u hennill.
• Gwasanaeth newydd ar lein ac ar y ffôn. Fel rhiant neu warcheidwad yn gofalu am fond eich plentyn, mae hyn yn ffordd sicr a hwylus i chi gadw golwg ar yr arian sydd gennych chi a'ch plentyn mewn Cynilion a Buddsoddiadau Cenedlaethol.

Rheolau i fuddsoddwyr

• O hyn ymlaen, ni ellir cadw Bondiau tan ben-blwydd 21 y plentyn. Bydd pob Bond yn aeddfedu’n derfynol unwaith y bydd wedi cyrraedd ei ben-blwydd pum mlynedd cyntaf ar neu ar ôl pen-blwydd 16 oed y plentyn.
• dim ond rhieni, gwarcheidwaid a (hen) neiniau a theidiau sy’n gallu buddsoddi. Os nad ydych yn perthyn i’r plentyn fel hyn, fyddwch chi ddim yn gallu prynu Bondiau newydd ar ei gyfer.
• ddim yn cael eu gwerthu mewn unedau o £25 bellach. Mae’r isafswm ar gyfer pob buddsoddiad yn dal yn £25, ond gall buddsoddiad mwy fod am unrhyw swm hyd at gyfanswm o £3,000 y plentyn bob Cyflwyniad.

Os oes gan eich plentyn Fond Bonws Plant, peidiwch â phoeni. Dim ond os bydd Bond yn aeddfedu ar neu ar ôl 20 Medi 2012, ac os byddwch yn dewis ei adnewyddu am dymor pellach, y bydd hyn yn effeithio arno. Felly, does dim rhaid i chi wneud unrhyw beth ar hyn o bryd.

Byddwn yn ysgrifennu atoch tua 30 diwrnod cyn y bydd Bond eich plentyn yn aeddfedu i’ch atgoffa ei bod yn bryd i chi benderfynu beth i’w wneud â’r arian. Byddwn yn cynnwys manylion llawn y newidiadau, a hefyd wybodaeth yn egluro’r dewisiadau fydd gennych ar gyfer ei adnewyddu neu dynnu’r arian allan. Os bydd eich plentyn yn 16 oed neu drosodd ar y diwrnod aeddfedu, byddwn yn ysgrifennu ato ef neu hi’n uniongyrchol gan mai ef neu hi fydd yn gyfrifol am y Bond.